وشەی پشکۆ

لەباتی نێرگز چەپکە ھەڵبەستی

سۆزی دەروونم ئەکەم بەدیاری

بۆ ئەو کەسانەی کە خۆشەویستیی

گیانیان ئەبەخشن بەکوردەواری

لەباتی ئاگر بەپشکۆی وشەی

زمانم، نەورۆز ھەڵئەگیرسێنم

لەباتی درەخت ئەم شەوە ڕەشەی

ناکۆکیی کوردی تیا ئەسووتێنم.

ئەو دڕک و چقڵەی ئەمساڵ چەقینە

پەڕەی گوڵاڵەی جەژنی نەورۆزم

ئەو فرمێسکانەی ئەمساڵ پەڕینە

چاوی ھەزاران کوردی دڵسۆزم

ئەو ھەنسکانەی لەقوڕگی شاخا

پەنگیان خواردەوە بوون بەھەڵمی خەم

ئەو ساوایانەی لەکۆشی داخا.

مەمکی بێشێریان خرایە سەر دەم

گووناھیان ئەستۆی ئەوانە ئەگرێ

کە بوونە زستان بۆ نەورۆزەکەم

دەستێ فرمێسکی ئازارم ناسڕێ

سووربووبێ بەخوێن، خوێنی ھۆزەکەم.

بەڵام کام ناپاک توانی شاڵاوی،

پڵنگی تۆڵەم ڕابوەستێنێ.

یان کام ئەژدەھاک توانی گەرداوی

دەریای ھەڵچوونم تیا بسرەوێنێ.

تا لووتکەی سپی، ڕێچکەی قەترە خوێن.

ڕژاوە بەڕێی دیاری خەباتا

بۆیە گوڵاڵەم لەوێدا ئەڕوێن

تا دیار بن لەناو باخی ئاواتا.

ئاگری کەژی جەژنی شانازیی

بەفوارەی خوێنم خۆش بووە ئەمڕۆ

بۆیە ئاوازی بەستەی ئازادیی

بەھەزاران دڵ نۆش بووە ئەمڕۆ

چەکووشی مەڵاس لەدەستی زبرا

چیرۆکی ھێزی ئەو برسیانەیە

لەش ئەتوێننەوە لەناو ئاگرا

"کاوە"م نموونەی ئەو داستانەیە.

کاوەی سەردەستەی چەوساوەی مێژووم

ئەو بانگەی کە دای لەلووتکەی بەرزا

بۆ نەوەی کوردی ئەمڕۆ و داھاتووم

دەنگ ئەداتەوە لەگەڵ نەورۆزا.

ڕەش و ڕووتی کورد ئارەقی ڕەنجیان

کردە سەر زەوی تینووی وڵاتم

ئەوسا دروێنەی سەختی تێکۆشان

بوو بەخەرمانی بەرھەمی مارتم